إلى فخامة “الرئيس” سليمان فرنجية: ريحلنا الصهر جبران تا يتفضا لمكتبه وشغله
الياس بجاني
03 كانون الأول/15
بحال وصلت يا بيك ع قصر بعبدا، وعينوك رئيس، ومبين لحد هلق إنو كل شي ماشي تمام وكرجة مي، منطلب منك تريح الصهر العوني المغوار جبران تا يقدر يتفضا لمكتبه وشغله.
حرام جبراننا تارك شغلة من كم سني وعم يشتغل للوطن وللناس ليل نهار.
عم يشتغل بالعتمي وبالضو و24/24 على اساس انو الكهرباء بتنقطع شي كم ساعة باليوم.
هو حاول يظبط الكهرباء تا تجي 24/24 بس الحريري وتياره ما خلوه.
دخيلك ما تحرج جبران وتجيبو وزير وتعطلو شغله. تركه حرام يلقط رزقه ويظبط شغل المكتب.
الرجل الباسيليوسي حقيقة ما قصر كفا ووفا وكتر خيرو.
وإذا بدك ترضي المون جنرال وتوقف ع خاطرو، عندو صهرين وابن اخت فيك تظبطون وتترك جبران ينتبه ع شغله.
إلا في حال كانت المصلحة العليا الوطنية والمارونية تقضي بتوزيره.
هلق نيي، ولما بتوصل وبترتاح، بدنا أول شي نبارك بطربوش وجاكيت يليقوا بموقع الرئاسة المارونية المردية حتى ما تعتب علينا ونضل ممنوع علينا نجي ع وطننا الحبيب متل كتير، كتير غيرنا.
نحنا ما منقدر على عتبك، وأملنا بعهدك ما نتوقف ع المطار ونتبهدل.
بصراحة، والصراحة راحة، نحنا بهيدك الساعة لمن “مردي بيصير الرئيس ببلدي”؟
هيدا شعارنا من اليوم وبالرايح مع شعار “وطني دائماً على حق”.
الله يكون بعون هالوطن قديش فيه الحق مبهدل!!
هيدا شعارنا بعهدك الميمون وبلبنان فرنجية على قافية سوريا الأسد.
وليش لا، ما في حدا أحسن من حدا!! ومن شو منشكي نحن المواني المردة؟
مردي ومن زغرتا، مش قليلي، ومنا القصة أبداً مزحة…حلم وتحقق وانفتحت إلنا ليلة القدر.
ما راح نطلب منك شي ما بتقدر تعملوه، لأنك من بيت البيك وليد جنبلاط، عراب الرئاسة المردية، نصحتنا مبارح نمد اجرينا ع قد بساطنا، ونحكي بي يلي منقدر عليه وبس، ونترك الأمور التانيي للأكبر منا…
كتير منيح، نصيحتك يعني، لا عنتريات سيادة واستقلال وحريات،
ولا 14 آذار السياسيين التعتير،
ولا مطالبة بنزع سلاح الحزب اللاهي،
ولا شعارات انسحاب الحزب من سوريا الأسد،
ولا تضييع وقت بدخول الدولة إلى الدويلة لأن الدويلة راح تصير الدولة عملاً بقواعد الخط.
ربنا يحميك، تبقى خلي السيدة فيرا يمين تشد همتها ع الإعلام وتشرح للناس فوئد ومنافع الخط والحسنات والأرباح وباقي كل المعزوفي إياها.
وعملاً بنصيحتك، نعم، شو بدنا بالقرارات الدولية 1559 و،1701 وكمان لشو المحكمة الدولية و50 مليون دولا مصاريف كل سني.
تضييع وقت ومصاريف وهم ع الفاضي ما بيجيب نتيجة.
وكمان بلا حياد وبلا بلوط!!
متل ما نصحتنا، كلون هودي امرون مش بإيدنا ولا إلنا موني عليون.، فخلينا نحطون ع الرف متل ما عمل الرئيس سعد الحريري الله يسعد ايامه ويلخيه بصحته.
ومبين ع المكشوف انو الرئيس سعد اقتنع بكلامك وبالنصائح وماشي معك ع الاخر.
وكمان الإستيذ نبيه عم يضحك بعبو وبلش من مبارح يخطط لإنتخابات حرة ونزيهة بيسترجع فيها النواب المسيحيي يلي شلحو ياهون عون بجزين وغيرها.
ومنطمنك إنو الحردانين من الساسيين ب 14 آذار “القرنبيط” جايين وركض لمن بتخلص خياطة جاكيتاتون وبيوصوا الطرابيش من عند عمنا اردوغان.
طرابيش عثمانية خلنش ومعمولي خصيصاً لحضرتكم.
باختصار مبروك للبنان بفرنجية، ولفرنجية لبنان،
هديتنا الرئاسية لك هي كتاب “تاريخ الموارنة” للأب بطرس ضو الذي يحكي بصدق تاريخ ونضال المردة. نتمنى عليك الإطلاع عليه بتأني وتعقل!!
**الكاتب ناشط لبناني اغترابي
عنوان الكاتب الألكتروني
Phoenicia@hotmail.com
مسامير وتغريدات تؤكد أننا في زمن محل وبؤس
الياس بجاني/03 كانون الأول/15
انتقلت إلى رحمته تعالى 14 آذار السياسيين ودفنت دون جنازة. أما 14 آذار الناس فباقية في الضمائر والوجدان وفي تضحيات الشهداء.
منظرة البيك والمسوّقة العنيدة والمفوهة لخطه العروبي والمقاوم السيدة فيرا يمين تتحضر لتسلم وزارة الإعلام إذا ظبطت مع البيك. بيلبقلها، مش هيك!!
الخبر اليقين بنجاح أو فشل مؤامرة بري-جنبلاط-الحريري “الإفرنجية” الرئاسية نعرفه فقط من موقف ابو الياس المر. فإذا أيد وبارك يعني ظبطت وركبت المؤامرة وإذا ضل لاطي وساكت معناتها مش ظابطة.
الرئيس بري زعلان وغيران من اللواء عباس ابراهيم وخايف يجي محله رئيس مجلس متل ما كان يخاف من جميل السيد. انتقاد بري للوضع في عرسال ودموع التماسيح ع السيادة هونيك هو انتقاد لعباس وعباس رد.
شعبنا معود ع برم وتغيير الطرابيش والجاكتات بأوقات الشدة. خبرونا غلياني كتير الطرابيش والجاكتات ببيروت!! الشباب السياسيين وماسحي الجوخ عم يحضروا حالون تا يهنو البيك بطرابيش وجاكتات جديدة.
سقطت هالة سعد الحريري إلى ما تحت التحت وهذا سقوط كان من المفترض أن يحدث منذ زيارات الأسد المذلة. الرجل بطبعه يعشق الاستسلام المجاني. متعودة!!
الغدنفار أحمد الحريري فعلاً صبي ومش خرج لا بالصيف ولا بالشتي. الشاب موعود بوزارة بعهد فرنجية. دخلكون أي وزارة بتلبقلو؟
زيارة الحريري للرئيس هولاند اليوم متل قلتها لأنه لم يعد يمثل من كان يمثل.. ومن انتقل إلى أحضانهم كانوا قطعوا له تكيت ون وي بعدها جاهزة وحاضرة. لا نثق به أبداً ولا يجب أن يثق به أي أحد بعد اليوم.
لأي حقيبة وزارية ترشح المغوار أحمد الحريري صاحب مقولة “لا يعلو صوت على صوت سعد” !!
الياس بجاني/02 كانون الأول/15
على افتراض وصل البيك سليمان عالرئاسة وتربع ودندل اجريه، ومبين واصل وبعجلي.. أكيد السيدة فيرا يمين خفيفة الظل والمهضومي كتير ومنظرة خط البيك والمسوّقه باستمرار لحسن خياراته وصوابية تحالفاتة والعبقرية سوف تتولى وزارة الإعلام وهات ع تنظير بالمقاومة والتحرير والممانعة والخط.
هيدا بحال ما نافسها على الحقيبة هيدي الفيلسوف المبهر والباهر وحامل اسرار المون جنرال نبيل نقولا ما غيرو.
بصراحة دخلكون أي حقيبة بتلبق للمغوار أحمد الحريري؟
البيك الزغرتاوي ما بينسى أفضال حدا وكتير وفي.
ولأنو الشيخ أحمد الحريري “الصبي” سكت وخرسن كل الأصوات بتيار المستقبل يلي وقفوا ضد البيك وقلون بنرفزة وبنبرة جدية وتهديدية “لا صوت يعلو على صوب الشيخ سعد، بيستاهل وزارة دسمي وحرزاني!!
نحنا منقترح وزارة الكهرباء لأنو الصهر جبران كان وجها خير وعقارات وقصور عليه؟
انتو شو بتقترحوا، خبرونا وطمنونا الله يريحكون.
ع فكرة، نحنا من هلقتني قررنا ننام ونترك بوابنا مفتوحة وكمان الشبابيك!! لأنو عهد البيك راح يكون عهد الأمن والأمان!!
قاطع الشهية
محمد عبد الحميد بيضون/فايسبوك/03 كانون الأول/15
الجميع في حالة حيرة وتساؤل عن موافقة سعد الحريري على انتخاب سليمان فرنجية صديق بشار الاسد رئيساً للجمهورية.
الواقع ان الحريري اتخذ هذا القرار عندما اكتشف ان الثروة العقارية لصهر الجنرال صارت اكبر من الثروة العقارية للحريري نفسه٠عندها وافق الحريري على فرنجية كونه الوحيد القادر حالياً على قطع الشهية العقارية لرئيس التيار الحليف وقطع الطريق على المرض العوني من الانتشار في الجسم السياسي للمارونية.
المعلوم أخطر من المجهول
أحمد الأسعد/03 كانون الأول/15
قد يكون خيار “المجهول” الذي يتم التخويف منه، أقل خطورة على لبنان من اعتماد خيار تسليم رئاسة الجمهورية إلى طرف معلوم الولاء لسوريا والتأييد لحزب الله وتوجهاته وسياساته.
وقد يكون خيار “المجهول” أرحم من رمي البلد عن سابق تصور وتصميم، وبوعي كامل، في أحضان نظام سوري سيكون وضعه الصعب داخلياً دافعاً إضافياً لتعزيز إمساكه بلبنان وبمفاصل القرار والسلطة فيه.
خيار تبني 14 آذار ترشيح سليمان فرنجية هو في الواقع أشبه بجعل النظام السوري يعبر مجدداً إلى لبنان على…”جسر الشغور”.
الحقيقة أن تقديم هذه الهدية للنظام المتهالك، هو بحدّ ذاته ما سمّاه فرنجية الوصول إلى الأسوأ. ما من سوء أكبر منه، وهو أفظع من الأسوأ الذي يتم التهويل به لتسويق التسوية.
ومهما حُكي عن ضمانات وتعهدات وسلّة متكاملة، فهي كلها تبقى غير كافية، إذ أن النظام السوري وحلفاءه هم أبرع من تنصّل من التعهدات، والتفّ على الضمانات، وهم أفضل من جعل السلال على أنواعها مثقوبة، وأفرَغها من مضمونها.
الأخطر من المجهول، هو الجهل بالنظام السوري وبنيّاته وأطماعه، وبقدرته على تجيير الأوضاع لمصلحته. وكونه منشغلاً بقضاياه الداخلية ليس سبباً للاطمئنان، إذ قد يكون وَضْعُ يده على لبنان المنفذ الذي يبحث عنه، والمتنفس الذي يسعى إليه، وقد يكون، كما قال فرنجية، “الفرصة الأخيرة”، ولكن ليس للبنان طبعاً، بل… لبشّار الأسد.